வாஷிங்டன் | ஆகஸ்ட் 5, 2026
இந்தியாவில் கிறிஸ்தவத்திற்கு இரண்டாயிரம் ஆண்டுகளுக்கும் மேலான வரலாறு இருப்பதை அமெரிக்க நாடாளுமன்ற உறுப்பினர் ரிலே மூர் (Riley Moore) வலியுறுத்தியுள்ளார்.
சமூக வலைதளமான X-இல் வெளியிட்ட தனது பதிவில், இந்தியாவில் கிறிஸ்தவம் வெளிநாட்டிலிருந்து சமீபத்தில் வந்த மதம் அல்ல என்றும், அதன் வேர்கள் முதல் நூற்றாண்டிலேயே பதியப்பட்டதாகவும் அவர் குறிப்பிட்டார்.
“கிறிஸ்தவம் இந்தியாவில் புதிதல்ல. புனித தோமா திருத்தூதர் மலபார் கடற்கரைக்கு வந்த காலத்திலிருந்தே கிறிஸ்தவர்கள் இந்தியாவில் வாழ்ந்து வருகின்றனர்,” என்று ரிலே மூர் தனது பதிவில் தெரிவித்துள்ளார்.
இந்தியாவில் கிறிஸ்தவ விசுவாசத்தின் வரலாறு புனித தோமா திருத்தூதரின் ஊழியத்துடன் தொடர்புபடுத்தப்படுகிறது. கிறிஸ்தவ பாரம்பரியத்தின்படி, கி.பி. 52-ஆம் ஆண்டு புனித தோமா மலபார் கடற்கரையை வந்தடைந்து, அங்கு சுவிசேஷத்தை அறிவித்து ஆரம்பகால கிறிஸ்தவச் சபைகளுக்கு அடித்தளம் அமைத்ததாக நம்பப்படுகிறது.
இந்த வரலாற்றுப் பின்னணியை நினைவூட்டிய ரிலே மூர், இந்தியாவில் பல நூற்றாண்டுகளாக கிறிஸ்தவ சமூகம் கல்வி, சுகாதாரம் மற்றும் சமூக சேவைகளில் குறிப்பிடத்தக்க பங்களிப்பை வழங்கி வருவதாக தனது கருத்தின் மூலம் எடுத்துரைத்தார்.
அவரது பதிவு, இந்தியாவில் கிறிஸ்தவத்தின் தொன்மையான வரலாறு மற்றும் அதன் சமூகப் பங்களிப்பு குறித்து மீண்டும் கவனத்தை ஈர்த்துள்ளது.
