கித்தோ: தென் அமெரிக்க நாடான ஈக்வடாரின் குவாயாகில் நகரில் உள்ள கத்தோலிக்க தேவாலயத்தில் பிரார்த்தனை நடைபெற்றுக் கொண்டிருந்தபோது, பெரிய சிலுவை ஒன்று பாதிரியார் மீது விழுந்ததில் அவர் உயிரிழந்தார். இந்தச் சம்பவம் நேரலையில் ஒளிபரப்பாகிக் கொண்டிருந்ததால் அதிர்ச்சியை ஏற்படுத்தியுள்ளது.
பாதிரியார் பேட்ரிசியோ அல்ப்ரெடோ சான்செஸ் மொலினாரி (52), பிரார்த்தனைக் கூட்டத்தில் பங்கேற்றவர்களிடையே வாழ்வின் நிலையற்ற தன்மை மற்றும் மரணம் குறித்து பிரசங்கம் செய்துகொண்டிருந்தார்.
பிரார்த்தனை தொடங்கி சுமார் அரை மணி நேரம் கடந்த நிலையில், அவருக்குப் பின்னால் சுவரில் பொருத்தப்பட்டிருந்த இயேசு கிறிஸ்துவின் உருவம் கொண்ட பெரிய மரச் சிலுவை திடீரெனக் கழன்று அவரது தலை மீது விழுந்தது. இதில் பலத்த காயமடைந்த அவர் சம்பவ இடத்திலேயே உயிரிழந்தார்.
இந்தச் சம்பவம் தொடர்பாக தேவாலய நிர்வாகம் விசாரணை நடத்தி வருகிறது. சுவரில் பொருத்தப்பட்டிருந்த சிலுவை திடீரெனக் கழன்று விழுந்ததற்கான காரணம் குறித்து விசாரிக்கப்பட்டு வருவதாக நிர்வாகம் தெரிவித்துள்ளது.
