ChatGPT-யை உருவாக்கிய OpenAI நிறுவனத்தின் புள்ளிவிவரங்களின்படி, ஒவ்வொரு வாரமும் மதம் தொடர்பாக சுமார் 7 கோடி கேள்விகள் இந்த செயற்கை நுண்ணறிவு (AI) சாட்பாட்டிடம் கேட்கப்படுகின்றன.
மதம் சார்ந்த கேள்விகள், மதப் பண்டிகைகள் மற்றும் முக்கியமான விசேஷ நாட்களின்போது அதிகரிப்பதாகவும் OpenAI கண்டறிந்துள்ளது. குறிப்பாக, ரமலான் மற்றும் ஈத் பண்டிகைக் காலங்களில் இஸ்லாம் தொடர்பான கேள்விகளும், ஈஸ்டர் பண்டிகையின்போது கிறிஸ்தவம் தொடர்பான கேள்விகளும் அதிகரிக்கின்றன.
கேள்விகளின் தன்மையைப் பொறுத்தவரை, கிட்டத்தட்ட மூன்றில் ஒரு பங்கு மத நூல்களைப் புரிந்துகொள்வது தொடர்பானவையாக இருந்தன. அதாவது, வாரத்திற்கு சராசரியாக 2.2 கோடி கேள்விகள் மத நூல்களின் விளக்கங்கள் குறித்து கேட்கப்பட்டுள்ளன. மேலும், சுமார் 1.6 கோடி கேள்விகள் மதச் சடங்குகள் மற்றும் பண்டிகைகளின் அர்த்தம் குறித்ததாக இருந்தன. இதேபோல், மத நம்பிக்கைகள், வாழ்க்கையின் அர்த்தம் மற்றும் ஆன்மீக வழிகாட்டுதல் தொடர்பாகவும் ஏராளமான கேள்விகள் கேட்கப்பட்டுள்ளன.
கிறிஸ்தவம் தொடர்பான கேள்விகளில் ஏறக்குறைய பாதி கேள்விகள் வேதாகம வசனங்கள் மற்றும் அவற்றின் விளக்கங்கள் குறித்தவையாக இருந்தன. அதேவேளையில், வெறும் 13 சதவீத கேள்விகள் மட்டுமே ஆராதனை, பிரசங்கங்கள் அல்லது திருச்சபை நடைமுறைகள் தொடர்பானவையாக இருந்தன.
“மக்கள் தங்களுடைய விசுவாசத்தை ஆழமாகப் புரிந்துகொள்வதற்காகவே செயற்கை நுண்ணறிவைப் பயன்படுத்துகின்றனர்; தங்களுடைய விசுவாசத்திற்கு மாற்றாக அதைப் பயன்படுத்துவதில்லை என்பதே இதன் பொதுவான கருத்தாகும்” என்று OpenAI தெரிவித்துள்ளது.
செயற்கை நுண்ணறிவு விசுவாசிகளின் ஆன்மீக வாழ்க்கைக்கு ஆதரவாகப் பயன்படுத்தப்பட்டாலும், அது உண்மையான ஆன்மீக வழிகாட்டுதலுக்கு மாற்றாக மாறிவிடக் கூடாது என்று அந்த நிறுவனம் தனது அறிக்கையில் குறிப்பிட்டுள்ளது.
“மக்கள் தங்களுடைய விசுவாசம் உட்பட, தங்களுக்கு முக்கியமான காரியங்களில் தொடர்ந்து வளர்ச்சியடைய செயற்கை நுண்ணறிவு உதவ வேண்டும். அதே நேரத்தில், மனித உறவுகளையும் மத அமைப்புகளையும் வலுப்படுத்த வேண்டுமே தவிர, அவற்றுக்கு மாற்றாக இருக்கக்கூடாது” என்று நிறுவனம் தெரிவித்துள்ளது.
மேலும், “மத வாழ்க்கை என்பது பகிரப்பட்ட பாரம்பரியங்கள், தனிப்பட்ட நம்பிக்கைகள் மற்றும் மக்களுக்கிடையிலான உறவுகளை அடிப்படையாகக் கொண்டது. இத்தகைய செயல்பாடுகளுக்கு செயற்கை நுண்ணறிவு உதவ முடியும். ஆனால், அவற்றுக்குப் பதிலாக ஒருபோதும் செயல்பட முடியாது” என்று ஆய்வாளர்கள் குறிப்பிட்டுள்ளனர்.
“செயற்கை நுண்ணறிவு என்பது மத உண்மைகளைத் தீர்மானிக்கும் அதிகாரமாகவோ அல்லது ஆன்மீக வழிகாட்டுதலுக்கு மாற்றாகவோ இருக்கக்கூடாது. அந்தப் பொறுப்புகள் தனிநபர்கள், மதத் தலைவர்கள் மற்றும் சபைகளுக்கே உரியவை.
மாறாக, மக்கள் தங்களுடைய விசுவாசத்தை நடைமுறைப்படுத்தவும், அதை ஆழமாகப் புரிந்துகொள்ளவும், ஒரே நம்பிக்கையைப் பகிர்ந்துகொள்ளும் மக்களுடன் அர்த்தமுள்ள உறவுகளை வளர்த்துக்கொள்ளவும் உதவும் கருவிகளை செயற்கை நுண்ணறிவு வழங்க முடியும்” என்றும் ஆய்வாளர்கள் தெரிவித்துள்ளனர்.
உலகின் மிகப்பெரிய இரண்டு மதங்களான கிறிஸ்தவம் மற்றும் இஸ்லாம் ஆகியவை மதம் தொடர்பான கேள்விகளில் அதிக கவனத்தைப் பெற்றுள்ளன.
2025 செப்டம்பர் முதல் 2026 செப்டம்பர் வரையிலான காலகட்டத்தில் கேட்கப்பட்ட கேள்விகளை அடிப்படையாகக் கொண்டு நடத்தப்பட்ட ஆய்வில், மதம் தொடர்பான கேள்விகளில் 45 சதவீதம் இஸ்லாம் குறித்தும், 34 சதவீதம் கிறிஸ்தவம் குறித்தும் இருந்ததாகக் கண்டறியப்பட்டுள்ளது.
இந்து மதம் தொடர்பான கேள்விகள் 4 சதவீதமாகவும், யூத மதம் தொடர்பான கேள்விகள் 2 சதவீதமாகவும், புத்த மதம் தொடர்பான கேள்விகள் 1 சதவீதமாகவும் பதிவாகியுள்ளன.
