பாவ சஞ்சலத்தை நீக்க
பிராண நண்பர்தான் உண்டே!
பாவ பாரம் தீர்ந்து போக
மீட்பர் பாதம் தஞ்சமே.
உலகக் கிறிஸ்தவ உலகில் அதிகம் நேசிக்கப்பட்டு, நூற்றுக்கணக்கான மொழிகளில் மொழிபெயர்க்கப்பட்டு பாடப்படும் கீர்த்தனைகளில் ஒன்றாக “What a Friend We Have in Jesus” விளங்குகிறது. தமிழில் “பாவ சஞ்சலத்தை நீக்க” என்ற பெயரில் அறியப்படும் இந்தப் பாடல், ஆழ்ந்த தனிப்பட்ட துயரங்களின் நடுவில் பிறந்த ஆறுதலின் கீதமாகும்.
பாடலாசிரியர் – ஜோசப் ஸ்கிரிவென்
இந்தப் பாடலை எழுதியவர் ஜோசப் மெட்காப் ஸ்கிரிவென் (Joseph Medlicott Scriven). இவர் 1819 ஆம் ஆண்டு அயர்லாந்தின் சீபாட்ரிக் (Seapatrick) என்னும் ஊரில் பிறந்தார்.
தனது ஆரம்பக் கல்வியை அங்கேயே முடித்த அவர், பின்னர் டப்ளினிலுள்ள டிரினிட்டி கல்லூரியில் (Trinity College Dublin) பட்டம் பெற்றார். கல்வி முடிந்ததும் அவரது திருமணம் நிச்சயிக்கப்பட்டது.
முதல் பெரும் துயரம்
திருமணத்திற்கு முந்தைய நாளில், அவரது மணமகள் குதிரையில் ஆற்றைக் கடக்க முயன்றபோது தவறி விழுந்து நீரில் மூழ்கி உயிரிழந்தார்.
ஆற்றின் மறுகரையில் நின்றிருந்த ஸ்கிரிவென், தனது கண்முன்னே நடந்த அந்தச் சம்பவத்தைப் பார்த்தும், அவரைக் காப்பாற்ற முடியாமல் துயரத்தில் உறைந்துபோனார்.
இந்தச் சம்பவம் அவரது வாழ்க்கையை முற்றிலும் மாற்றியது.
கனடாவுக்கு இடம்பெயர்ந்த வாழ்க்கை
இந்த மனவேதனையை மறக்க 1845 ஆம் ஆண்டு, தனது 25-வது வயதில் கனடாவுக்குச் சென்றார். அங்கு ஆசிரியராகப் பணியாற்றிய அவர், மிகவும் எளிமையான வாழ்க்கை வாழ்ந்தார்.
தன்னிடம் இருந்த சொத்துக்களையும் வருமானத்தையும் ஏழைகள், நோயாளிகள், விதவைகள் மற்றும் அனாதைகளுக்காக செலவிட்டார். தன்னுக்காக வாழாமல், பிறருக்காக வாழ்ந்த கிறிஸ்தவ ஊழியராக அறியப்பட்டார்.
இரண்டாவது சோதனை
கனடாவில் வாழ்ந்தபோது மீண்டும் ஒரு இளம்பெண்ணைத் திருமணம் செய்ய முடிவு செய்தார்.
ஆனால் திருமணத்திற்கு முன்பாக, ஞானஸ்நானம் பெற்ற பின்னர் ஏற்பட்ட கடுமையான காய்ச்சலால் அந்த இளம்பெண்ணும் மரணமடைந்தார்.
இரண்டு முறை திருமணத்திற்கு முன்பே தனது மணமகளை இழந்த ஸ்கிரிவென், அளவிட முடியாத மனவேதனையை அனுபவித்தார்.
ஒரு தாயை ஆறுதல்படுத்தப் பிறந்த பாடல்
அயர்லாந்தில் வாழ்ந்த அவரது வயதான தாயார், மகனின் வாழ்க்கையில் தொடர்ந்து நிகழ்ந்த இந்த துயரங்களால் மிகவும் மனமுடைந்திருந்தார்.
அவரை ஆறுதல்படுத்தும் நோக்கில், 1855 ஆம் ஆண்டு ஜோசப் ஸ்கிரிவென் ஒரு கவிதையை எழுதினார். அதுவே பின்னர் உலகம் முழுவதும் பாடப்படும் கீர்த்தனையாக மாறியது.
அதன் தமிழாக்கமே:
பாவ சஞ்சலத்தை நீக்க
பிராண நண்பர்தான் உண்டே!
பாவ பாரம் தீர்ந்து போக
மீட்பர் பாதம் தஞ்சமே.
இந்தப் பாடலின் மையச் செய்தி மிகவும் எளிமையானது:
“எந்தத் துயரமாயினும், எந்தப் பாரமாயினும், அதை ஜெபத்தில் இயேசுவிடம் கொண்டு செல்லுங்கள்.”
ஜெபத்தின் வல்லமை
பாடலின் ஒவ்வொரு சரணமும் ஜெபத்தின் அவசியத்தை வலியுறுத்துகிறது.
சால துக்க துன்பத்தாலே
நெஞ்சம் நொந்து சோருங்கால்,
துன்பம் இன்பமாக மாறும்
ஊக்கமான ஜெபத்தால்.
மேலும்,
கஷ்ட நஷ்டம் உண்டானாலும்
இயேசுவண்டை சேருவோம்;
மோச நாசம் நேரிட்டாலும்
ஜெப தூபம் காட்டுவோம்.
என்று, எல்லா சூழ்நிலைகளிலும் கிறிஸ்துவை நம்பும்படி அழைக்கிறது.
“இந்தப் பாடலை ஆண்டவரும் நானும் சேர்ந்து எழுதினோம்”
ஒருநாள், இந்தக் கவிதையைப் பார்த்த அவரது நண்பர்,
“இந்தப் பாடலை யார் எழுதியது?”
என்று கேட்டார்.
அதற்கு ஸ்கிரிவென் மிகவும் தாழ்மையுடன்,
“இந்தப் பாடலை ஆண்டவரும் நானும் சேர்ந்தே எழுதினோம்.”
என்று பதிலளித்தார்.
அவரது தேவநம்பிக்கையையும் தாழ்மையையும் வெளிப்படுத்தும் புகழ்பெற்ற சம்பவமாக இது நினைவுகூரப்படுகிறது.
உலகம் முழுவதும் ஒலிக்கும் கீர்த்தனை
“What a Friend We Have in Jesus” உலகின் மிகவும் பிரபலமான கிறிஸ்தவக் கீர்த்தனைகளில் ஒன்றாகும்.
இது நூற்றுக்கணக்கான மொழிகளில் மொழிபெயர்க்கப்பட்டுள்ளது. தமிழ், தெலுங்கு, இந்தி, மலையாளம் உள்ளிட்ட இந்திய மொழிகளிலும் பல தலைமுறைகளாக பாடப்பட்டு வருகிறது.
எளிமையான வார்த்தைகளில் ஆழமான ஆறுதலை வழங்கும் இந்தக் கீர்த்தனை, எண்ணற்ற மக்களின் துயர நேரங்களில் தேவனுடைய சமாதானத்தை நினைவூட்டியுள்ளது.
இறுதிக்காலம்
தன் வாழ்நாளின் இறுதியில் ஜோசப் ஸ்கிரிவென் உடல்நலக் குறைவு, வறுமை மற்றும் தனிமையோடு வாழ்ந்தார்.
1886 ஆம் ஆண்டு, தனது 66-வது வயதில், கனடாவின் ஒன்டாரியோ மாநிலத்தில் உள்ள ரைஸ் லேக் (Rice Lake) அருகே ஒரு சிற்றோடையில் தவறி விழுந்து உயிரிழந்தார்.
முடிவுரை
இரண்டு முறை திருமணத் துயரம், தனிமை, வறுமை, உடல்நலக் குறைவு—இவை அனைத்தையும் அனுபவித்த ஒரு மனிதனின் கண்ணீரிலிருந்து பிறந்ததே “பாவ சஞ்சலத்தை நீக்க” என்ற கீர்த்தனை.
இன்று கோடிக்கணக்கான விசுவாசிகள் தங்களுடைய பாரங்களையும் துயரங்களையும் இயேசுவிடம் ஒப்படைக்கும்போது இந்தப் பாடலைப் பாடுகிறார்கள்.
இந்தக் கீர்த்தனை நமக்கு நினைவூட்டும் மிகப் பெரிய உண்மை:
“நாம் இழக்கிற ஆறுதலும் சமாதானமும், ஜெபத்தில் தேவனிடம் கொண்டு செல்லாததால்தான்.”
எனவே, வாழ்க்கையில் எந்தச் சுமை வந்தாலும், எந்தத் துயரம் வந்தாலும், நமது உண்மையான நண்பராகிய இயேசு கிறிஸ்துவிடம் ஜெபத்தில் செல்லுவோம்.
நன்றி: தமிழ் கிறிஸ்தவ வரலாற்றுக் குறிப்புகள்
