பர்மா (மியான்மர்) தேசத்திற்குச் சென்று, இரவும் பகலும் பல ஊழியங்களைச் செய்தவர் மிஷனெரி டாக்டர் அடோனிராம் ஜட்சன். பல ஆண்டுகள் கடினமாக உழைத்து, வேதாகமத்தைப் பர்மிய மொழியில் மொழிபெயர்த்தார். அந்தப் பணியை முடித்த உடனேயே அவர் கைது செய்யப்பட்டு, கொடுமையான சிறையில் அடைக்கப்பட்டார்.
ஆனால், அந்த மொழிபெயர்ப்புப் பிரதியை அரசாங்கம் கைப்பற்றி அழித்துவிடுமோ என்ற பயத்தில், மிஷனெரியின் மனைவி சில காலம் அந்தப் பிரதியைப் பூமியில் புதைத்து வைத்திருந்தார்.
ஜட்சனுக்கு அந்தக் கையெழுத்துப் பிரதியை மீண்டும் ஒருமுறை வாசிக்க வேண்டும் என்ற ஆசை ஏற்பட்டது. எனவே, தனது மனைவிக்குத் இரகசியமாகச் செய்தி அனுப்பினார். அவருடைய மனைவியும் ஒரு வழியைக் கண்டுபிடித்தார்.
அந்தக் கையெழுத்துப் பிரதியைப் பஞ்சில் சுற்றி, ஒரு பெரிய தலையணையாக உருவாக்கி, சிறையில் இருந்த ஜட்சனிடம் கொடுத்தனுப்பினார். நீண்ட நாட்களாக அந்தத் தலையணை ஜட்சனுடன் சிறையில் இருந்தது. இரவில் யாரும் பார்க்காதபடி, அவ்வப்போது தலையணையைப் பிரித்து, அதற்குள் இருந்த வேதாகம மொழிபெயர்ப்பைப் படிப்பார். அந்த அளவிற்கு அவர் தேவனுடைய வார்த்தையின்மேல் அன்பு வைத்திருந்தார்.
ஒருநாள், ஜட்சனை ஒரு சிறையிலிருந்து மற்றொரு சிறைக்கு மாற்றினார்கள். அப்போது அந்தத் தலையணையை எடுத்துச் செல்ல அனுமதிக்கவில்லை. சிறை அதிகாரி அதைத் தூக்கி வெளியே வீசி எறிந்தான்.
தலையணை வெளியே போய் விழுந்தது. அதற்குள் இருந்த பொக்கிஷத்தை இழந்துவிட்டோமே என்று ஜட்சன் அடைந்த வேதனையைச் சொல்லி முடியாது. அவர் தேம்பித் தேம்பி அழுதார்.
ஆனால், கர்த்தருடைய திட்டம் வேறாக இருந்தது!
அந்த வழியாக வந்த ஒரு கிறிஸ்தவர், கீழே கிடந்த தலையணையைக் கண்டெடுத்தார். அதற்குள் இருந்த கையெழுத்துப் பிரதியைப் பார்த்தபோது அவருடைய உள்ளம் மகிழ்ச்சியால் நிறைந்தது. தனது தாய்மொழியில் வேதாகமம் மொழிபெயர்க்கப்பட்டிருப்பதைக் கண்டு ஆண்டவருக்கு நன்றி செலுத்தினார்.
அந்தப் பிரதியைப் பாதுகாத்து, பலருக்கும் பயன்படும்படி அதன் நகலை உருவாக்குவதற்கான முயற்சிகளை மேற்கொண்டார். காலப்போக்கில், பர்மிய மொழியில் வேதாகமம் அச்சிடப்பட்டு, பல மக்களின் கைகளுக்குச் சென்றடைந்தது.
நீதிக்கதை சொல்லும் பாடம்
தேவனுடைய வார்த்தை எவ்வளவு விலையேறப்பெற்ற பொக்கிஷம் என்பதை இந்தச் சம்பவம் நமக்கு நினைவூட்டுகிறது. உலகப் பொருட்களை இழந்தால் மீண்டும் சம்பாதிக்கலாம். ஆனால், தேவனுடைய வார்த்தையை அலட்சியப்படுத்தாமல், அதை நம் இருதயத்தில் பொக்கிஷமாகப் பாதுகாக்க வேண்டும்.
“உம்முடைய வசனம் என் கால்களுக்குத் தீபமும், என் பாதைக்கு வெளிச்சமுமாயிருக்கிறது.” (சங்கீதம் 119:105)
வேதாகமம் வெறும் புத்தகம் அல்ல; அது நம் வாழ்க்கைக்கு வழிகாட்டும் தேவனுடைய வார்த்தை!
